روحل کوسي جو قبو: روحل کوسي جو قبو ضلعي دادوءَ جي شهر جوهيءَ کان ٿوري پنڌ تي اولهه طرف آهي. روحل خان کوسو جوهي جي کوسن جو سردار هو. جوهي ۽ آسپاس ۾ سندس اثر هو. هن پنهنجي حياتيءَ ۾ ئي جوهيءَ ڀرسان پنهنجي لاءِ قبو تعمير ڪرائي، ان ۾ پڪي قبر ٺهرائي ڇڏي هئي. 1782ع ۾ ميان عبدالنبي ڪلهوڙي ۽ مير فتح علي خان ٽالپر جي وچ ۾ جنگ لڳي، ته روحل خان کوسو پنهنجي لشڪر سميت ميان عبدالنبي ڪلهوڙي پاران ميرن سان جنگ وڙهيو هو. روحل کوسي، پنهنجو لشڪر وٺي هالا واري پاسي مير فتح علي خان ٽالپر جي لشڪر سان مقابلو ڪيو ۽ وڙهندي مارجي ويو. سندس لاش نه مليو. هن جنگ ۾ ميرن، ڪلهوڙن کي شڪست ڏني ۽ روحل جو قبو خالي رهجي ويو، جنهن ۾ سندس ٺهرايل خالي مزار آهي.